Anna Soffía og Rafn Kumar verja titla sína á Vormóti HMR-TSÍ 100

Fyrsta tennismót ársins á vegum Tennissamband – Vormót HMR-TSÍ 100, lauk í gær í Tennishöllinni í Kópavogi. Alls tóku 130 keppendur þátt, á aldrinum fimm til fimmtíu og sjö ára, og var keppt í ellefu mismunandi flokkum yfir fjóra keppnisdaga. Mótið heppnaðist afar vel og var þátttaka og stemning til fyrirmyndar.

Sigurvegarar í WTN einliðaleik karla og kvenna voru þau sömu og í fyrra – Anna Soffía Grönholm (TFK) og Rafn Kumar Bonifacius (HMR) – og vörðu þau þar með titla sína með glæsibrag.

Í einliðaleik kvenna var hörð og spennandi þríkeppni milli Önnu Soffíu, Sofiu Sóleyjar Jónasdóttur (TFK) og Riya Nitinkumar Kalugade (HMR). Allir þrír leikirnir réðust í oddalotu (match-tiebreak) í loka­setti, sem sýnir hve jafnt var á með keppendum. Sofia Sóley hafnaði í öðru sæti og Riya í því þriðja.

Í einliðaleik karla sigraði Rafn Kumar á móti Daniel Pozo (Fjölnir) örugglega 6–4, 6–1. Þá vann Andri Mateo Oscarsson Uscategui (TFK) á móti Ómar Pál Jónasson (TFK) í æsispennandi leik, 0–6, 6–2, 12–10, eftir dramatíska oddalotu.

Í WTN-tvíliðaleik sameinuðu Anna Soffía og Sofia Sóley krafta sína og báru sigurorð af bræðrunum Rafni Kumar og Ívani Kumar Bonifacius (HMR) í spennandi leik, 4–2, 3–4, 7–5. Í leik um þriðja sæti sigruðu Ewald Mateo Moura Pálsson (TFK) og Hady Mansour (TFK) þau Ívu Jovisic (Fjölnir) og Saule Zukauskaite (Fjölnir), 4-3, 4-2.